മേഴത്തൂർ: അറിവ് പകരുന്നതിനപ്പുറം വിദ്യാർത്ഥികളിൽ ആത്മവിശ്വാസം വളർത്തിയെടുക്കുന്നതാണ് വിദ്യാഭ്യാസത്തിന്റെ പ്രധാന ലക്ഷ്യമെന്ന് വി.ടി. ബൽറാം എംഎൽഎ പറഞ്ഞു. മേഴത്തൂർ ഗവ. ഹയർസെക്കൻഡറി സ്കൂളിൽ സംഘടിപ്പിച്ച വിജയോത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇന്നത്തെ തലമുറയ്ക്ക് അറിവിനൊപ്പം ആത്മവിശ്വാസവും ജീവിത വിജയത്തിന് അനിവാര്യമാണെന്നും അദ്ദേഹം പറഞ്ഞു.
തൃത്താല ഗ്രാമപഞ്ചായത്ത് പ്രസിഡന്റ് ജയന്തി വിജയകുമാർ അധ്യക്ഷത വഹിച്ചു. ചടങ്ങിൽ സ്കൂൾ ശതാബ്ദി സ്മരണിക എംഎൽഎ പ്രകാശനം ചെയ്തു. ജില്ലാ പഞ്ചായത്ത് അംഗം ഇന്ദിരാദേവി ടീച്ചർ സ്മരണിക ഏറ്റുവാങ്ങി. വിവിധ ജനപ്രതിനിധികളും പി.ടി.എ, എസ്.എം.സി ഭാരവാഹികളും ചടങ്ങിൽ പങ്കെടുത്തു.
ജില്ലാ പഞ്ചായത്തംഗം ഇന്ദിരാദേവി ടീച്ചർ, ബ്ലോക്ക് പഞ്ചായത്ത് അംഗം പി. ദിവ്യ, ഗ്രാമപഞ്ചായത്ത് അംഗം പ്രിയ പ്രമോദ്, പി.ടി.എ പ്രസിഡന്റ് പി.എം. ശശികുമാർ, എസ്.എം.സി ചെയർമാൻ മണികണ്ഠൻ, പി.ടി.എ വൈസ് പ്രസിഡന്റ് അഷ്റഫ് അലി, എസ്.എം.സി പ്രസിഡന്റ് ഉണ്ണികൃഷ്ണൻ, എം.പി.ടി പ്രസിഡന്റ് ഷീല, മാഗസിൻ കമ്മിറ്റി കൺവീനർ ഡോ. ജയശ്രീ എന്നിവർ സംസാരിച്ചു.
പ്ലസ് ടു പരീക്ഷയിൽ 1200ൽ 1200 മാർക്ക് നേടിയ കൃഷ്ണജ കെ ഉൾപ്പെടെ എസ്.എസ്.എൽ.സി, ഹയർസെക്കൻഡറി പരീക്ഷകളിൽ ഉന്നത വിജയം നേടിയ വിദ്യാർത്ഥികളെയും വിവിധ സ്കോളർഷിപ്പ് പരീക്ഷകളിൽ വിജയികളായവരെയും ചടങ്ങിൽ അനുമോദിച്ചു. വിജയികൾക്ക് വി.ടി. ബൽറാം എംഎൽഎ ഉപഹാരങ്ങൾ വിതരണം ചെയ്തു. സ്കൂൾ പ്രിൻസിപ്പൽ ഷെൽജ പി.ബി സ്വാഗതവും ഹെഡ്മാസ്റ്റർ ഉണ്ണികൃഷ്ണൻ നന്ദിയും രേഖപ്പെടുത്തി.
