കുടുംബശ്രീ ദേശീയ സരസ് മേളയുടെ ഭാഗമായി മുതിർന്ന പത്രപ്രവർത്തകനും സാഹിത്യകാരനുമായ ടി.വി.എം. അലിയെ ആദരിച്ചു. ബുധനാഴ്ച രാത്രി ക്യാപ്റ്റൻ ലക്ഷ്മി വേദിയിൽ നടന്ന ആദരസദസ്സിൽ ചേലക്കര എം.എൽ.എ യു.ആർ. പ്രദീപ് പൊന്നാടയും പ്രശസ്തിപത്രവും നൽകി ആദരിച്ചു.
കേരള മീഡിയ പേഴ്സൺസ് യൂണിയൻ (KMPU) സംസ്ഥാന സമിതി അംഗവും തൃത്താല മേഖല പ്രസിഡൻ്റും കൂറ്റനാട് പ്രസ് ക്ലബ് അംഗവുമായ ടി.വി.എം. അലി മേഖലയിലെ ഏറ്റവും മുതിർന്ന പത്രപ്രവർത്തകരിലൊരാളാണ്.
എക്സ്പ്രസ് പത്രത്തിൽ ലേഖകനായി മാധ്യമ രംഗത്ത് തുടക്കം കുറിച്ച അദ്ദേഹം പിന്നീട് മാധ്യമം പത്രത്തിലും പട്ടാമ്പി കേബിൾ വിഷൻ എന്നിവിടങ്ങളിലും സേവനമനുഷ്ഠിച്ചു. നിലവിൽ സ്വലെ ഓൺലൈൻ മീഡിയയുടെ എഡിറ്ററായി പ്രവർത്തിച്ചു വരികയാണ്.
സാഹിത്യകാരനെന്ന നിലയിലും ശ്രദ്ധേയനായ ടി.വി.എം. അലി നിരവധി പുസ്തകങ്ങൾ രചിച്ചിട്ടുണ്ട്. 2022-ൽ എം.ടി. വേണു സാഹിത്യ പുരസ്കാരം ലഭിച്ചിട്ടുണ്ട്. ദീർഘകാലത്തെ മാധ്യമ പ്രവർത്തനത്തിനും സാഹിത്യ സംഭാവനകൾക്കും ഉള്ള അംഗീകാരമായാണ് അദ്ദേഹത്തെ ആദരിച്ചത്.
