പ്രാദേശിക ഫുട്ബോൾ പ്രേമികൾ കാത്തിരുന്ന ആവേശപ്പോരാട്ടങ്ങൾക്ക് പെരുമണ്ണൂരിൻ്റെ മണ്ണിൽ നാളെ കൊടിയേറും. ചാലിശ്ശേരി പെരുമണ്ണൂർ യുവധാര ക്ലബ്ബിന്റെ നേതൃത്വത്തിൽ സംഘടിപ്പിക്കുന്ന പതിമൂന്നാമത് അഖില കേരള ഫുട്ബോൾ ടൂർണമെന്റിനുള്ള ഒരുക്കങ്ങളെല്ലാം പൂർത്തിയായി. നാളെ മുതൽ ഒരാഴ്ചക്കാലം പെരുമണ്ണൂർ ഗ്രാമത്തെ ഫുട്ബോൾ ലഹരിയിലാഴ്ത്തുന്ന കായികമാമാങ്കത്തിനാണ് ഇതോടെ തുടക്കമാവുന്നത്.
തൃശൂർ, പാലക്കാട്, മലപ്പുറം ജില്ലകളിൽ നിന്നുള്ള കരുത്തരായ എട്ട് പ്രമുഖ ടീമുകളാണ് ഇത്തവണ കിരീടത്തിനായി പെരുമണ്ണൂരിൽ മാറ്റുരയ്ക്കുന്നത്. എല്ലാ ദിവസവും വൈകിട്ട് അഞ്ചരയ്ക്കാണ് മത്സരങ്ങൾ ആരംഭിക്കുക. ഉദ്ഘാടന മത്സരത്തിൽ മൈതാനത്തെ കരുത്തരായ ഒ.ആർ.പി.സി കേച്ചേരിയും പ്രണവം പെരുമണ്ണൂരും തമ്മിൽ നേർക്കുനേർ പോരാടും.
ടൂർണമെന്റിലെ ജേതാക്കളെ കാത്തിരിക്കുന്നത് ആകർഷകമായ സമ്മാനങ്ങളാണ്. പെരുമ്പിലാവ് വിദ്യ റസിഡൻസി സ്പോൺസർ ചെയ്യുന്ന വിന്നേഴ്സ് പ്രൈസ് മണിയും പെരുമണ്ണൂർ പ്രവാസി കൂട്ടായ്മ നൽകുന്ന ശിവൻ മെമ്മോറിയൽ വിന്നേഴ്സ് ട്രോഫിയുമാണ് ചാമ്പ്യന്മാർക്ക് ലഭിക്കുക. റണ്ണേഴ്സ് അപ്പാകുന്നവർക്ക് ചാലിശ്ശേരി സലിം സോമിൽ നൽകുന്ന റണ്ണേഴ്സ് ഗ്രാൻഡ് മണിയും ബാലേട്ടൻ പെരുമണ്ണൂർ റണ്ണേഴ്സ് ട്രോഫിയും സമ്മാനിക്കും.
നാളെ വൈകിട്ട് നടക്കുന്ന പ്രൗഢഗംഭീരമായ ചടങ്ങിൽ തൃത്താല ബ്ലോക്ക് പഞ്ചായത്ത് പ്രസിഡന്റ് പി. ആർ. കുഞ്ഞുണ്ണി ടൂർണമെന്റിന്റെ ഉദ്ഘാടനം നിർവ്വഹിക്കും. വിവിധ രാഷ്ട്രീയ പാർട്ടി പ്രമുഖരും സാമൂഹിക സാംസ്കാരിക രംഗത്തെ പ്രമുഖരും നാട്ടുകാരും ഉദ്ഘാടന ചടങ്ങിൽ പങ്കാളികളാകും. വരും ദിവസങ്ങളിൽ പെരുമണ്ണൂരിൻ്റെ മൈതാനത്തേക്ക് ജനസാഗരമൊഴുകുമെന്ന പ്രതീക്ഷയിലാണ് സംഘാടകർ.
