തൃത്താലയുടെ വിദ്യാഭ്യാസ–ആരോഗ്യ മേഖലകളിൽ പുതിയ ചരിത്രം കുറിച്ച് തൃത്താല ഗവൺമെൻ്റ് നഴ്സിംഗ് കോളേജ് നാടിന് സമർപ്പിച്ചു. ഗ്രാമീണ മേഖലയിലെ സാധാരണക്കാരായ വിദ്യാർത്ഥികൾക്ക് മികച്ച നഴ്സിംഗ് വിദ്യാഭ്യാസം ഉറപ്പാക്കുക എന്ന ലക്ഷ്യത്തോടെയാണ് സർക്കാർ ഈ സ്ഥാപനം ആരംഭിച്ചിരിക്കുന്നത്.
കൂറ്റനാട് നന്തിയംകോട് കുന്നത്ത് സ്ഥിതി ചെയ്യുന്ന പഴയ കോ-ഓപ്പറേറ്റീവ് കോളേജ് കെട്ടിടം നവീകരിച്ചാണ് നഴ്സിംഗ് കോളേജിനായി സജ്ജമാക്കിയിരിക്കുന്നത്. ആവശ്യമായ അടിസ്ഥാന സൗകര്യങ്ങളും പഠന–പരിശീലന സംവിധാനങ്ങളും ഒരുക്കിയ കോളേജ്, ഭാവിയിൽ ആരോഗ്യ മേഖലയ്ക്ക് പ്രാപ്തരായ നഴ്സുമാരെ നൽകുന്ന കേന്ദ്രമായി മാറുമെന്ന് അധികൃതർ അറിയിച്ചു.
2026 മാർച്ച് 2 തിങ്കളാഴ്ച വൈകുന്നേരം 3.30ന് നടന്ന ഉദ്ഘാടന ചടങ്ങ് ഉന്നത വിദ്യാഭ്യാസ മന്ത്രി ആർ. ബിന്ദു ഉദ്ഘാടനം ചെയ്തു. ചടങ്ങിൽ തൃത്താല എംഎൽഎയും മന്ത്രിയുമായ എം.ബി. രാജേഷ് അധ്യക്ഷത വഹിച്ചു. ഉദ്ഘാടന പ്രസംഗത്തിൽ മന്ത്രി ആർ. ബിന്ദു, വിദ്യാഭ്യാസവും ആരോഗ്യവുമെന്ന രണ്ട് പ്രധാന മേഖലകളെ ഒരുമിച്ച് ശക്തിപ്പെടുത്തുന്ന പദ്ധതിയാണ് ഗവൺമെൻ്റ് നഴ്സിംഗ് കോളേജുകൾ എന്ന് പറഞ്ഞു. ഗ്രാമീണ മേഖലകളിലെ വിദ്യാർത്ഥികൾക്ക് ഗുണമേൻമയുള്ള നഴ്സിംഗ് വിദ്യാഭ്യാസം ലഭ്യമാകുന്നത് സംസ്ഥാനത്തിന്റെ പൊതുആരോഗ്യ സംവിധാനത്തിന് വലിയ കരുത്താകുമെന്നും അവർ വ്യക്തമാക്കി.
അധ്യക്ഷത വഹിച്ചു സംസാരിച്ച മന്ത്രി എം.ബി. രാജേഷ്, തൃത്താല മണ്ഡലത്തിന്റെ ദീർഘകാല സ്വപ്നമായിരുന്നു ഗവൺമെൻ്റ് നഴ്സിംഗ് കോളേജ് എന്നത് എന്ന് പറഞ്ഞു. ഈ സ്ഥാപനം മേഖലയുടെ വിദ്യാഭ്യാസ–ആരോഗ്യ പുരോഗതിയിൽ നിർണായക പങ്ക് വഹിക്കുമെന്നും, പ്രദേശത്തെ വിദ്യാർത്ഥികൾക്ക് പുതിയ അവസരങ്ങൾ തുറന്നു കൊടുക്കുമെന്നും അദ്ദേഹം കൂട്ടിച്ചേർത്തു.ജനപ്രതിനിധികൾ, ഉദ്യോഗസ്ഥർ, വിദ്യാഭ്യാസ–ആരോഗ്യ മേഖലകളിലെ വിദഗ്ധർ, നാട്ടുകാർ തുടങ്ങിയവർ പങ്കെടുത്ത ചടങ്ങ്, തൃത്താലയുടെ വികസന ചരിത്രത്തിലെ ഒരു നിർണായക നാഴികക്കല്ലായി മാറി.
