വോട്ടർപട്ടികയിലെ ക്രമക്കേടുകളും പ്രത്യേക തീവ്ര പരിശോധനയും (SIR) ചൂണ്ടിക്കാട്ടി മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യാ സഖ്യം ഡൽഹിയിൽ പ്രതിഷേധ മാർച്ച് നടത്തി. പാർലമെന്റിൽ നിന്ന് തെരഞ്ഞെടുപ്പ് കമ്മിഷൻ ആസ്ഥാനത്തേക്ക് നടത്തിയ മാർച്ചിലാണ് വി.ഡി. സതീശൻ ഉൾപ്പെടെയുള്ള നേതാക്കൾ പങ്കെടുത്തത്.
രാഹുൽ ഗാന്ധി, പ്രിയങ്ക ഗാന്ധി, മല്ലികാർജുൻ ഖാർഗെ തുടങ്ങിയവരുടെ നേതൃത്വത്തിലായിരുന്നു പ്രതിഷേധം. മുദ്രാവാക്യങ്ങളും പ്ലക്കാർഡുകളുമായാണ് എംപിമാർ മാർച്ചിൽ അണിനിരന്നത്. തെരഞ്ഞെടുപ്പ് കമ്മിഷൻ ആസ്ഥാനത്തിന് സമീപം പൊലീസ് ബാരിക്കേഡ് സ്ഥാപിച്ച് മാർച്ച് തടഞ്ഞതോടെ പ്രതിഷേധം ശക്തമായി.
തുടർന്ന് പ്രതിഷേധിച്ച നേതാക്കളെയും എംപിമാരെയും പൊലീസ് ബലമായി നീക്കുകയും കസ്റ്റഡിയിലെടുക്കുകയും ചെയ്തു. കേരളത്തിൽ നിന്നുള്ള കെ.സി. വേണുഗോപാൽ, ബെന്നി ബെഹനാൻ, കൊടിക്കുന്നിൽ സുരേഷ് തുടങ്ങിയ എംപിമാരെയും വി.ഡി. സതീശനടക്കമുള്ള നേതാക്കളെയും പൊലീസ് കസ്റ്റഡിയിലെടുത്തതായി റിപ്പോർട്ടുണ്ട്.
രാഹുൽ ഗാന്ധിയും പ്രിയങ്ക ഗാന്ധിയും ഉൾപ്പെടെയുള്ള നേതാക്കൾ ആകാശവാണി ഭവൻ വളപ്പിൽ കുത്തിയിരുന്ന് പ്രതിഷേധം തുടർന്നു. മണിക്കൂറുകൾ നീണ്ട പ്രതിഷേധത്തിനൊടുവിൽ ഇവരെയും പൊലീസ് കസ്റ്റഡിയിലെടുത്തു. ഗ്യാനേഷ് കുമാറിന്റെ രാജിയും വോട്ടർപട്ടികയുമായി ബന്ധപ്പെട്ട വിഷയങ്ങളിൽ വ്യക്തതയും ആവശ്യപ്പെട്ടാണ് ഇന്ത്യാ സഖ്യം പ്രതിഷേധം നടത്തിയത്.
