തിരുവനന്തപുരം: തലസ്ഥാനത്ത് എഐഎസ്എഫ്-എഐവൈഎഫ് സമരക്കാര്ക്കെതിരെ പ്രയോഗിച്ച ജലപീരങ്കിയിലെ വെള്ളത്തില് അണുബാധയില്ലെന്ന് ശാസ്ത്രീയ പരിശോധന ഫലം. വെള്ളത്തില് നേരിയ അളവിൽ ഇരുമ്പിന്റെ അംശങ്ങള് മാത്രമാണുള്ളതെന്നും പരിശോധന ഫലത്തിൽ പറയുന്നു. സമരത്തില് പങ്കെടുത്തവര്ക്കെതിരെ പ്രയോഗിച്ചത് മലിനജലമാണെന്ന് ആരോപണം ഉയര്ന്നിരുന്നു. പരിശോധന ഫലം പുറത്തുവന്നതിന് പിന്നാലെ പ്രതികരിച്ച് ആഭ്യന്തര വകുപ്പ് മന്ത്രി രമേശ് ചെന്നിത്തലയും രംഗത്തെത്തിയിരുന്നു.
മലിനജലം ഉപയോഗിച്ചില്ലെന്നും ആവശ്യമില്ലാതെ പൊലീസിനെ ആക്രമിച്ചപ്പോള് ഉണ്ടായ നടപടിയായിരുന്നു അതെന്നുമാണ് രമേശ് ചെന്നിത്തല പറഞ്ഞത്. കഴിഞ്ഞ പത്ത് വര്ഷവും ഉപയോഗിച്ച അതേ വെള്ളം തന്നെയാണ് ഇപ്പോഴും ഉപയോഗിക്കുന്നത്. ഒരു വ്യത്യാസവും ഇല്ലെന്നും രമേശ് ചെന്നിത്തല പറഞ്ഞു.പിഎം ശ്രീക്കെതിരെ എഐഎസ്എഫ്-എഐവൈഎഫ് പ്രവര്ത്തകര് സെക്രട്ടേറിയറ്റിലേക്ക് നടത്തിയ മാര്ച്ചിന് നേരെയായിരുന്നു പൊലീസ് ജലപീരങ്കി പ്രയോഗിച്ചത്. ജൂണ് 22നായിരുന്നു സംഭവം. മുന് മന്ത്രി കെ രാജന്റേ നേതൃത്വത്തിലായിരുന്നു പ്രതിഷേധം സംഘടിപ്പിച്ചത്.
ജലപീരങ്കി പ്രയോഗത്തില് കെ രാജന് ഉള്പ്പെടെ നനഞ്ഞു. പൊലീസ് ചീറ്റിയ വെള്ളം ശേഖരിച്ച് കെ രാജന് പ്രതിപക്ഷ നേതാവ് പിണറായി വിജയന് കൈമാറി. സഭയില് വെള്ള കുപ്പിയുമായി എത്തി പൊലീസിനെതിരെ രൂക്ഷ വിമര്ശനമായിരുന്നു പിണറായി വിജയന് ഉന്നയിച്ചത്. ജലപീരങ്കി സാധാരണയായി ഉപയോഗിക്കാറുണ്ടെന്നും എന്നാല് പകര്ച്ചാവ്യാധികള് പടര്ന്നുപിടിക്കുന്ന സാഹചര്യം കൂടി നിലനില്ക്കുമ്പോള് ചെളിവെള്ളമാണ് പൊലീസ് ഉപയോഗിച്ചത് എന്നത് ഗൗരവമുള്ള കാര്യമാണെന്നായിരുന്നു പിണറായി വിജയന് പറഞ്ഞത്.
സംഭവം വിവാദമായതിനെ തുടര്ന്നായിരുന്നു ശാസ്ത്രീയ പരിശോധന. പ്രതിപക്ഷം കൈമാറിയ വെള്ളം ശാസ്ത്രീയ പരിശോധനക്കായി തിരുവനന്തപുരം സിറ്റി പൊലീസ് കമ്മീഷണര്ക്ക് ആഭ്യന്തരമന്ത്രി കൈമാറി. ജലഅതോറ്ററ്റിയുടെ ലാബില് പരിശോധന നടത്തി. ഇതിന്റെ പരിശോധനാ ഫലമാണ് ഇപ്പോള് പുറത്തുവന്നിരിക്കുന്നത്. സഭയില് വയ്ക്കാന് റിപ്പോര്ട്ട് പൊലീസ് ആഭ്യന്തരമന്ത്രിക്ക് കൈമാറിയിട്ടുണ്ട്.
