വാവന്നൂരിൽ വീട്ടിൽ കയറി ആക്രമണം നടത്തി എന്ന പരാതിയിൽ ഞാങ്ങാട്ടിരി സ്വദേശിയായ കൊഴിക്കാട്ടിൽ വീട്ടിൽ സൻഫീറിനെ ചാലിശ്ശേരി പോലീസ് അറസ്റ്റ് ചെയ്തു. കഴിഞ്ഞ ദിവസം രാവിലെയാണ് പ്രതി മരപ്പലകയും കല്ലും കൈയിൽ എടുത്ത് തെക്കേ വാവനൂരിലെ വീട്ടിൽ അതിക്രമിച്ച് കയറി അക്രമം നടത്തിയത്.
വീടിന് മുന്നിൽ പാർക്ക് ചെയ്തിരുന്ന കാറിന്റെ ചില്ലുകൾ പൂര്ണമായും അടിച്ചു തകർത്തു. തുടർന്ന് വീടിന്റെ ജനൽ ചില്ലുകളും നിരീക്ഷണ ക്യാമറയും തല്ലിത്തകർത്തതായാണ് പോലീസ് റിപ്പോർട്ട്. വീട്ടിലെ ഒരാളോടുള്ള വ്യക്തി വൈരാഗ്യമാണ് സംഭവത്തിന് പിന്നിലെന്നാണ് പ്രാഥമിക നിഗമനം.
സൻഫീറിനെതിരായി മോഷണം, ലഹരി ആരോപണങ്ങൾ എന്നിവ ഉൾപ്പെടെ 15 ഓളം കേസുകൾ നിലവിലുണ്ടെന്ന് പോലീസ് അറിയിച്ചു. എസ്.ഐ അരവിന്ദാക്ഷൻ, എ.എസ്.ഐ സുരേഷ്, സ്ക്വാഡ് അംഗങ്ങളായ അബ്ദുൽ റഷീദ്, കമൽ എന്നിവരുൾപ്പെട്ട സംഘമാണ് പ്രതിയെ പിടികൂടിയത്. പിന്നീട് ഇയാളെ കോടതിയിൽ ഹാജരാക്കി റിമാൻഡിൽ വിട്ടു.