കൂറ്റനാട്: ചാലിശ്ശേരി സെന്റ് പീറ്റേഴ്സ് ആൻഡ് സെന്റ് പോൾസ് യാക്കോബായ സുറിയാനി പള്ളിയിൽ യേശുക്രിസ്തുവിന്റെ തിരുജനന ശുശ്രൂഷകൾ ഭക്തിസാന്ദ്രമായ അന്തരീക്ഷത്തിൽ നടന്നു. ബുധനാഴ്ച രാത്രി സന്ധ്യാ പ്രാർത്ഥനയോടെയാണ് തിരുപറവി ശുശ്രൂഷകൾക്ക് തുടക്കമായത്.
സൂത്താറ പ്രാർത്ഥനയും പാതിരാ പ്രാർത്ഥനയും തുടർന്ന് ക്രിസ്തുമസിന്റെ ഏറ്റവും അനുഗ്രഹകരമായ തീജ്വാല ശുശ്രൂഷ നടന്നു. വൈദീകനും മദ്ബഹ ശുശ്രൂഷകരും വിശ്വാസികളും ചേർന്ന് പള്ളിക്ക് മുന്നിൽ പ്രത്യേകമായി ഒരുക്കിയ തീജ്വാലയ്ക്ക് മുന്നിലെത്തി. വികാരി ഫാ. ബിജു മുങ്ങാംകുന്നേൽ പ്രത്യേക പ്രാർത്ഥന നടത്തി തീജ്വാലയ്ക്ക് തീ കൊളുത്തി. തുടർന്ന് കുന്തിരിക്കവും സുഗന്ധദ്രവ്യങ്ങളും സമർപ്പിച്ച് വിശ്വാസികൾ തീജ്വാലയെ വണങ്ങി.
പിന്നീട് പൊൻ–വെള്ളി കുരിശുകളേന്തിയും കത്തിച്ച മെഴുകുതിരികളുമായി നൂറുകണക്കിന് വിശ്വാസികൾ വൈദീകനോടും മദ്ബഹ ശുശ്രൂഷകരോടും ചേർന്ന് പള്ളിക്ക് ചുറ്റും പ്രദക്ഷിണം നടത്തി. തുടർന്ന് മദ്ബഹായിലെ നാലു ദിക്കുകളിലേക്കും സ്ലീബാ ആഘോഷവും നടന്നു.
പ്രഭാത പ്രാർത്ഥനയ്ക്ക് ശേഷം വിശുദ്ധ കുർബാന അർപ്പിച്ചു. വികാരി ഫാ. ബിജു മുങ്ങാംകുന്നേൽ എല്ലാവർക്കും സ്നേഹത്തിന്റെയും സന്തോഷത്തിന്റെയും ക്രിസ്തുമസ് ആശംസകൾ നേർന്നു. തുടർന്ന് സ്നേഹവിരുന്നും സംഘടിപ്പിച്ചു.
ക്രിസ്തുമസ് ആഘോഷങ്ങൾക്ക് വികാരി ഫാ. ബിജു മുങ്ങാംകുന്നേൽ, ട്രസ്റ്റി സി.യു. ശലമോൻ, സെക്രട്ടറി ടൈറ്റസ് ഡേവീഡ് എന്നിവരടങ്ങുന്ന മാനേജിംഗ് കമ്മിറ്റി നേതൃത്വം നൽകി.
