പശ്ചിമേഷ്യയിൽ പ്രാദേശിക സംഘർഷാവസ്ഥ രൂക്ഷമായി തുടരുന്നതിനിടെ യുഎഇയിൽ നിന്നുള്ള വിമാന സർവീസുകൾക്ക് തടസ്സം നേരിടുന്നു. സുരക്ഷാ മുൻകരുതലുകളുടെ ഭാഗമായി എമിറേറ്റ്സ്, ഇത്തിഹാദ്, എയർ അറേബ്യ, ഫ്ലൈദുബായ് തുടങ്ങിയ പ്രമുഖ വിമാനക്കമ്പനികൾ ചില സർവീസുകൾ റദ്ദാക്കുകയും മറ്റ് ചിലതിന്റെ സമയക്രമം മാറ്റുകയും ചെയ്തു. പ്രധാനമായും ബഹ്റൈൻ, കുവൈറ്റ് തുടങ്ങിയ ഗൾഫ് രാജ്യങ്ങളിലേക്കുള്ള വിമാനങ്ങളെയാണ് ഈ മാറ്റങ്ങൾ ബാധിച്ചിരിക്കുന്നത്.
സുരക്ഷാ സാഹചര്യം കണക്കിലെടുത്ത് ദുബായിൽ നിന്ന് ബഹ്റൈനിലേക്കുള്ള രണ്ട് സർവീസുകൾ എമിറേറ്റ്സ് റദ്ദാക്കിയിട്ടുണ്ട്. അബുദാബി ആസ്ഥാനമായി പ്രവർത്തിക്കുന്ന ഇത്തിഹാദ് എയർവേസ് ടെൽ അവീവിൽ നിന്നുള്ള ഒരു സർവീസ് റദ്ദാക്കി. കൂടാതെ, എയർ അറേബ്യയുടെ കുവൈറ്റ്, ബഹ്റൈൻ സർവീസുകളിലും മാറ്റങ്ങളുണ്ട്. നിലവിൽ ഫ്ലൈദുബായ് ഈ റൂട്ടുകളിൽ കൂടുതൽ സർവീസുകളും ഷെഡ്യൂൾ പ്രകാരം നടത്തുന്നുണ്ടെങ്കിലും മറ്റ് ചില അന്താരാഷ്ട്ര റൂട്ടുകളിൽ വിമാനങ്ങൾ വൈകാനും റദ്ദാക്കാനും സാധ്യതയുണ്ട്.
മേഖലയിലെ വ്യോമപാതകളുമായി ബന്ധപ്പെട്ട സുരക്ഷാ വിലയിരുത്തലുകൾ നിമിഷങ്ങൾക്കുള്ളിൽ മാറിക്കൊണ്ടിരിക്കുന്നതിനാൽ അവസാന നിമിഷവും ഷെഡ്യൂളുകളിൽ മാറ്റങ്ങൾ വരാൻ ഇടയുണ്ട്. അതിനാൽ ടിക്കറ്റ് കൈവശമുണ്ടെങ്കിലും യാത്ര ഉറപ്പാണെന്ന് കരുതരുത് എന്ന് വിമാനക്കമ്പനികൾ മുന്നറിയിപ്പ് നൽകുന്നു. ദുബായ്, അബുദാബി തുടങ്ങിയ വിമാനത്താവളങ്ങളിൽ എത്തുന്നതിന് മുൻപ് തന്നെ സർവീസുകൾ കൃത്യമായി നടക്കുന്നുണ്ടോ എന്ന് പരിശോധിക്കേണ്ടതുണ്ട്.
