കൂറ്റനാട് സ്ലാബുകൾ തകർന്നത് അപകട ഭീഷണിയാകുന്നു

നിലമ്പൂർ - പെരുമ്പിലാവ് പാതയിൽ കൂറ്റനാട് ടൗണിൽ വിവിധ സ്ഥലങ്ങളിൽ അഴുക്കുചാലുകളിലെ സ്ലാബുകൾ തകർന്നിരിക്കുന്നത് അപകട ഭീഷണി ഉയർത്തുന്നു. ഗുരുവായൂർ പാതയിലെ സ്വകാര്യ ആശുപത്രിക്ക് മുൻപിൽ ഇത്തരത്തിൽ അഞ്ചിലധികം കുഴികളാണ് കാൽനട - വാഹനയാത്രക്കാർക്ക് ഭീഷണി ഉയർത്തുന്നത്.

കഴിഞ്ഞ കുറച്ച് മാസങ്ങളായി നിരവധി വാഹനങ്ങളാണ് രാത്രികാലങ്ങളിൽ കുഴിയിൽ വീണ് അപകടത്തിൽപ്പെടുന്നത്. അഴുക്കുചാലിനു മുകളിൽ സ്ലാബില്ലാത്തായിട്ട് ഒന്നര വർഷമായെന്നും അപകടങ്ങൾ ഇവിടെ പതിവാണെന്നും ആശുപത്രിക്ക് സമീപമുള്ള ഓട്ടോ - ടാക്സി ഡ്രൈവർമാർ പറഞ്ഞു. 

കുഴിയിലേക്ക് വാഹനങ്ങൾ വീഴാതിരിക്കുവാൻ നാട്ടുകാർ കുഴിയിൽ ഉണങ്ങിയ മരച്ചില്ലകൾ അടയാളമായി വെച്ചിരിക്കുകയാണ്. അതേസമയം പാതയിൽ പലയിടങ്ങളിലും അപകട സാധ്യത മേഖലകളിൽ സുരക്ഷ കൾ ഒരുക്കണമെന്നാവശ്യവും ശക്തമാണ്.