പട്ടാമ്പി : സാമൂഹിക, സാംസ്കാരിക, വികസന മേഖലകളിൽ നൽകിയ ശ്രദ്ധേയമായ സംഭാവനകൾ പരിഗണിച്ച് ഭാരതീയ ദളിത് സാഹിത്യ അക്കാദമിയുടെ അംബേദ്കർ ഫെല്ലോഷിപ്പ് പുരസ്കാരം തിരുമിറ്റക്കോട് ഗ്രാമപഞ്ചായത്ത് പ്രസിഡന്റ് സുഹറ തയ്യിലിന് ലഭിച്ചു.പുരസ്കാരം ഡിസംബർ 12, 13 തീയതികളിൽ ഡൽഹി പഞ്ചശീല ആശ്രമത്തിൽ നടക്കുന്ന ചടങ്ങിൽ സമ്മാനിക്കുമെന്ന് അക്കാദമിയുടെ ജനറൽ സെക്രട്ടറി ഡോ. എസ്. സുമനാക്ഷർ അറിയിച്ചു.മലപ്പുറം വളാഞ്ചേരിയിലാണ് സുഹറയുടെ ജനനം. വളാഞ്ചേരി ഗവ. യു.പി. സ്കൂളിലും തിരുമിറ്റക്കോട് ചാത്തന്നൂർ ഹൈസ്കൂളിലും വിദ്യാഭ്യാസം പൂർത്തിയാക്കിയ ശേഷം പട്ടാമ്പി ഗവ. സംസ്കൃത കോളേജിൽ ഉപരിപഠനം നടത്തി. തുടർന്ന് ജനറൽ നഴ്സിംഗ് പഠനം പൂർത്തിയാക്കി സ്വകാര്യ ആശുപത്രിയിൽ ജോലി ചെയ്തു.
1995 മുതൽ പൊതു പ്രവർത്തന രംഗത്ത് സജീവമായ സുഹറ, 2000 മുതൽ കുടുംബശ്രീയുടെ പ്രവർത്തനങ്ങളുമായി അടുപ്പം പുലർത്തി. 2015-ൽ തിരുമിറ്റക്കോട് ഗ്രാമപഞ്ചായത്തിൽ നിന്ന് വാർഡ് 18 (വടക്കെ വെള്ളടിക്കുന്ന്) പ്രതിനിധിയായി തിരഞ്ഞെടുക്കപ്പെട്ടു. തുടർന്ന് വൈസ് പ്രസിഡന്റ് പദവിയും വഹിച്ചു. 2020-ൽ വീണ്ടും തിരഞ്ഞെടുക്കപ്പെട്ട അവർ ഇപ്പോൾ പഞ്ചായത്ത് പ്രസിഡണ്ടാണ്.കുടുംബശ്രീ രംഗത്ത് ചെയർപേഴ്സൺ, വൈസ് ചെയർപേഴ്സൺ എന്നീ നിലകളിൽ പ്രവർത്തിച്ച സുഹറ, പിന്നാക്ക കുടുംബങ്ങളെ കണ്ടെത്തി ആശ്രയ പദ്ധതി നടപ്പാക്കുന്നതിലും, സ്ത്രീകളുടെ സാമ്പത്തിക-സാമൂഹിക ശാക്തീകരണത്തിനായുള്ള പദ്ധതികൾ രൂപപ്പെടുത്തുന്നതിലും നിർണായക പങ്ക് വഹിച്ചു.
നെല്ലിക്കാട്ടിരി കേന്ദ്രീകരിച്ച് കുടുംബശ്രീ അംഗങ്ങളുടെ പ്രൊഡക്ഷൻ യൂണിറ്റ് സ്ഥാപിക്കുന്നതിലും അത് വിജയകരമായി മുന്നോട്ടു നയിക്കുന്നതിലും അവർ നേതൃത്വം വഹിച്ചു. തിരുമിറ്റക്കോട് സർവീസ് സഹകരണ ബാങ്ക് ഡയറക്ടറായും സേവനം അനുഷ്ഠിച്ചിട്ടുണ്ട്.2018-ൽ പാലക്കാട് യുവജന ക്ഷേമബോർഡിന്റെ മികച്ച സംരംഭക അവാർഡും 2024-ൽ മികച്ച സ്ത്രീശാക്തീകരണ പ്രവർത്തനത്തിനുള്ള എൻ.ജി.ഒ. അവാർഡും സുഹറ നേടി.മലപ്പുറം ജില്ലയിലെ വളാഞ്ചേരി തയ്യിൽ വീട്ടിൽ പരേതരായ അബ്ദുൽ കാദർ – ബിയ്യുമ്മ ദമ്പതികളുടെ എട്ടാമത്തെ മകളായ സുഹറ, ഭർത്താവ് അബൂബക്കർ, മക്കൾ ഷാഫി അക്ബർ (ബിസിനസ്), ഫസ്ന, മരുമക്കൾ യാസിറ (ടീച്ചർ), ഷെഫീഖ് എന്നിവർ അടങ്ങുന്ന കുടുംബത്തിലാണ്.