
ആനക്കര: ഒരു ഗ്രാമപഞ്ചായത്തിലെ പ്രസിഡന്റ് തെരഞ്ഞെടുപ്പ് തർക്കം സംസ്ഥാനതലത്തിൽ തന്നെ വലിയ രാഷ്ട്രീയ ചർച്ചയായി മാറുകയാണ്. കോൺഗ്രസും മുസ്ലിം ലീഗും തമ്മിലുള്ള അഭിപ്രായവ്യത്യാസം പരിഹരിക്കാനാകാതെ പോയതോടെ ആനക്കര ഗ്രാമപഞ്ചായത്തിന്റെ ഭരണം എൽ.ഡി.എഫിന് ലഭിച്ച സംഭവം രാഷ്ട്രീയ കേന്ദ്രങ്ങളിൽ ശ്രദ്ധ നേടുന്നു. മുന്നണിക്കുള്ളിലെ തർക്കം പരിഹരിക്കുന്നതിൽ കോൺഗ്രസ് നേതൃത്വം പരാജയപ്പെട്ടതാണോ ഭരണനഷ്ടത്തിന് കാരണമെന്ന ചോദ്യവും ഉയരുകയാണ്.
മുൻ പ്രസിഡന്റ് പി.എൻ. അംബികയെ വീണ്ടും പ്രസിഡന്റ് സ്ഥാനത്തേക്ക് കൊണ്ടുവരണമെന്ന കോൺഗ്രസ് നിലപാടാണ് തർക്കത്തിന്റെ പ്രധാന കാരണം. അംബികയ്ക്ക് പകരം കോൺഗ്രസിലെ മറ്റൊരു അംഗത്തെ പ്രസിഡന്റ് സ്ഥാനത്തേക്ക് പരിഗണിക്കണമെന്നായിരുന്നു പ്രാദേശിക മുസ്ലിം ലീഗിന്റെ ആവശ്യം. എന്നാൽ മറ്റൊരു സ്ഥാനാർത്ഥിയെ പരിഗണിക്കാൻ പോലും തയ്യാറാകാത്ത നിലപാടാണ് പ്രതിസന്ധി രൂക്ഷമാക്കിയതെന്ന് ലീഗ് നേതൃത്വം ആരോപിക്കുന്നു. തൃത്താല എം.എൽ.എ വി.ടി. ബൽറാമിന്റെ പിടിവാശിയാണ് സമവായസാധ്യതകൾ ഇല്ലാതാക്കിയതെന്നും ലീഗ് നേതൃത്വം കുറ്റപ്പെടുത്തുന്നു.
പ്രശ്നപരിഹാരത്തിനായി കെ.പി.സി.സി നിർവാഹക സമിതി അംഗം സി.വി. ബാലചന്ദ്രൻ മാസ്റ്റർ പരമാവധി ശ്രമങ്ങൾ നടത്തിയിരുന്നു. ഇരുപാർട്ടികൾക്കുമിടയിൽ ധാരണയുണ്ടാക്കാനും മറ്റൊരു സ്ഥാനാർത്ഥിയെ പരിഗണിച്ച് പ്രതിസന്ധി അവസാനിപ്പിക്കാനും അദ്ദേഹം നടത്തിയ ഇടപെടലുകൾക്കും ഫലമുണ്ടായില്ലെന്നാണ് പ്രാദേശിക ലീഗ് നേതൃത്വത്തിന്റെ ആരോപണം. സമവായത്തിനുള്ള ശ്രമങ്ങൾ നടന്നിട്ടും കോൺഗ്രസ് നിലപാടിൽ മാറ്റമുണ്ടാകാത്തതാണ് തർക്കം നീണ്ടുപോകാൻ കാരണമായതെന്നാണ് ലീഗിന്റെ വിശദീകരണം.
നവംബർ 16ന് നടക്കേണ്ടിയിരുന്ന പ്രസിഡന്റ് തെരഞ്ഞെടുപ്പ് കോൺഗ്രസും മുസ്ലിം ലീഗും വിട്ടുനിന്നതോടെ മാറ്റിവെക്കേണ്ടിവന്നു. പിന്നീട് നടന്ന തെരഞ്ഞെടുപ്പിലും മുസ്ലിം ലീഗ് അംഗങ്ങൾ വിട്ടുനിന്നു. കോൺഗ്രസ്, സി.പി.എം, ബി.ജെ.പി അംഗങ്ങൾ പങ്കെടുത്ത തെരഞ്ഞെടുപ്പിൽ എം.വി. ജംസീന പ്രസിഡന്റായി തെരഞ്ഞെടുക്കപ്പെട്ടു. ഇതോടെ ആനക്കര ഗ്രാമപഞ്ചായത്തിന്റെ ഭരണം എൽ.ഡി.എഫിന് ലഭിച്ചു.
ഒരു പ്രസിഡന്റ് സ്ഥാനത്തെച്ചൊല്ലിയുള്ള തർക്കം പഞ്ചായത്ത് ഭരണം തന്നെ നഷ്ടപ്പെടുന്ന സാഹചര്യത്തിലേക്ക് എത്തിച്ചതാണ് രാഷ്ട്രീയ വൃത്തങ്ങളിൽ ചർച്ചയാകുന്നത്. പ്രാദേശിക തലത്തിൽ പരിഹരിക്കാമായിരുന്ന തർക്കം സംസ്ഥാനതലത്തിൽ ചർച്ചയാകുന്ന രാഷ്ട്രീയ പ്രതിസന്ധിയായി വളർന്നതിൽ കോൺഗ്രസ് നേതൃത്വത്തിന്റെ പങ്കും ചോദ്യം ചെയ്യപ്പെടുന്നു.
വി.ടി. ബൽറാമിന്റെ നിലപാടും സി.വി. ബാലചന്ദ്രൻ മാസ്റ്ററുടെ അനുനയശ്രമങ്ങളും ഒരുപോലെ ചർച്ചയാകുമ്പോൾ കോൺഗ്രസ് നേതൃത്വത്തിന് മുന്നിലുള്ള രാഷ്ട്രീയ ചോദ്യവും വലുതാണ്. മുസ്ലിം ലീഗുമായി ഒരു സമവായത്തിലെത്താൻ കഴിയാതിരുന്നതിന്റെ ഉത്തരവാദിത്തം ആർക്കാണ്? ഒരു സ്ഥാനാർത്ഥിയെച്ചൊല്ലിയുള്ള പിടിവാശിക്ക് പഞ്ചായത്ത് ഭരണം തന്നെ നഷ്ടപ്പെടുത്തേണ്ടിവന്നത് രാഷ്ട്രീയ പക്വതയാണോ? ആനക്കരയിലെ സംഭവവികാസങ്ങൾ തൃത്താലയിലെ കോൺഗ്രസ്–മുസ്ലിം ലീഗ് ബന്ധത്തിൽ മാത്രമല്ല, സംസ്ഥാനത്തെ യു.ഡി.എഫ് രാഷ്ട്രീയത്തിലും പുതിയ ചർച്ചകൾക്ക് വഴിതുറക്കുകയാണ്.