ദോഹ: ഖത്തറിലെ കായികപ്രേമികൾക്കിടയിൽ ആവേശം നിറച്ച്, ഖത്തർ കൂറ്റനാട് ജനകീയ കൂട്ടായ്മ സംഘടിപ്പിക്കുന്ന 'കൂറ്റനാട് പ്രീമിയർ ലീഗ് (KPL) 2025' ഫുട്ബോൾ ടൂർണമെൻ്റ് നവംബർ 21-ന് വെള്ളിയാഴ്ച അൽ മെഷാഫിലെ ജംസ് അമേരിക്കൻ അക്കാദമിയിൽ ആരംഭിക്കും. വൈകുന്നേരം 3.00 മണിക്ക് കിക്കോഫ് ചെയ്യപ്പെടുന്ന ടൂർണമെന്റിൽ പ്രാദേശിക ഫുട്ബോൾ രംഗത്തെ പ്രമുഖരായ ചുങ്കം ബ്രദേഴ്സ്, റോയൽ എഫ് സി, എഫ് സി കൂറ്റനാട്, കിംഗ്സ് കൂറ്റനാട് എന്നിങ്ങനെ നാല് ശക്തമായ ടീമുകളാണ് കിരീടത്തിനായി ഏറ്റുമുട്ടുന്നത്. ഫുട്ബോളിനോടുള്ള തങ്ങളുടെ സ്നേഹം ആഘോഷിക്കുന്നതോടൊപ്പം, പ്രവാസികൾക്കിടയിൽ സൗഹൃദവും കായികക്ഷമതയും പ്രോത്സാഹിപ്പിക്കുക എന്ന ലക്ഷ്യത്തോടെയാണ് കൂട്ടായ്മ ഈ ടൂർണമെൻ്റ് സംഘടിപ്പിക്കുന്നത്. ടീം ഉടമകളായ സക്കീർ വി പി, സലീം കെ വി, കാദർ എ വി, ജലീൽ എ.വി എന്നിവർ ടീമുകൾക്ക് മികച്ച പിന്തുണയുമായി രംഗത്തുണ്ട്. പ്രഗത്ഭരായ മാനേജർമാരുടെയും ഉപദേശകരുടെയും നേതൃത്വത്തിൽ ടീമുകൾ പരിശീലനം പൂർത്തിയാക്കി കഴിഞ്ഞു. നവംബർ 21 വെള്ളിയാഴ്ച ഉച്ചയ്ക്ക് 3 മണിക്ക് നടക്കുന്ന ഉദ്ഘാടന ചടങ്ങിൽ ഖത്തറിലെ പ്രമുഖ സാമൂഹ്യ-സാംസ്കാരിക നേതാക്കൾ പങ്കെടുക്കും. പ്രവേശനം സൗജന്യമായിരിക്കും. കൂടുതൽ വിവരങ്ങൾക്കും ടൂർണമെൻ്റ് അപ്ഡേറ്റുകൾക്കുമായി അനസ് വാവനൂരിനെ 70079910 എന്ന നമ്പറിൽ ബന്ധപ്പെടാവുന്നതാണ്.