ഇരട്ട ന്യൂനമർദങ്ങൾ രൂപപ്പെട്ടതിനെ തുടർന്ന് സംസ്ഥാനത്ത് ഇനിയുള്ള ദിവസങ്ങളിൽ അതിശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. പലയിടങ്ങളിലും മിന്നലോടുകൂടിയ മഴയും പ്രളയസാധ്യതയും നിലനിൽക്കുന്ന സാഹചര്യം മുന്നിൽകണ്ട് വിവിധ ജില്ലകളിൽ മുന്നറിയിപ്പുകൾ ശക്തമാക്കി.
കണ്ണൂർ, കോഴിക്കോട്, കാസർകോട്, മലപ്പുറം ജില്ലകളിലും ലക്ഷദ്വീപിലും ഞായറാഴ്ച ഓറഞ്ച് മുന്നറിയിപ്പ് പ്രഖ്യാപിച്ചു. പത്തനംതിട്ട, കോട്ടയം, എറണാകുളം, ഇടുക്കി, പാലക്കാട്, വയനാട്, തൃശ്ശൂർ ജില്ലകളിൽ മഞ്ഞ മുന്നറിയിപ്പാണ്. ഒക്ടോബർ 20-ന് തിരുവനന്തപുരം, ആലപ്പുഴ, കൊല്ലം ഒഴികെയുള്ള എല്ലാ ജില്ലകളിലും മഞ്ഞ മുന്നറിയിപ്പ് തുടരും. 20, 21 തീയതികളിൽ മഴ ശക്തമാകുമെന്നാണ് പ്രവചനം.
സ്ഥിതിഗതികൾ കൂടുതൽ ദുഷ്കരമായാൽ അതിനനുസരിച്ച് കടുത്ത മുന്നറിയിപ്പുകൾ നൽകേണ്ട സാഹചര്യം ഉണ്ടാകാമെന്നും കാലാവസ്ഥാ വകുപ്പ് അറിയിച്ചു. ഒക്ടോബർ അവസാനംവരെ മഴ തുടരുമെന്നാണു സൂചന.