തൃത്താല: വിവിധ ആവശ്യങ്ങളും ഉന്നയിച്ചും പ്രതിഷേധങ്ങൾ അറിയിച്ചും യുഡിഎഫ് തൃത്താല പഞ്ചായത്ത് കമ്മിറ്റി സംഘടിപ്പിച്ച പ്രതിഷേധ ധർണ്ണ തൃത്താല പഞ്ചായത്ത് ഓഫീസിന് മുന്നിൽ നടന്നു. മാട്ടായ വനിതാ സഹകരണ സംഘത്തിലെ നിക്ഷേപ തട്ടിപ്പിൽ നാലാം പ്രതിയായ പഞ്ചായത്ത് പ്രസിഡണ്ട് രാജിവെക്കണമെന്നും, ആറാം വാർഡിലെ തലയണപറമ്പ് റോഡ് നിർമ്മാണത്തിലെ അഴിമതി വിജിലൻസ് അന്വേഷിക്കണമെന്നും യുഡിഎഫ് നേതാക്കൾ ആവശ്യപ്പെട്ടു.
ഹാർബർ ഫണ്ടിന്റെ 25 ലക്ഷം രൂപ ഉപയോഗിച്ച് നിർമാണം ആരംഭിച്ച റോഡിന്റെ 500 മീറ്റർ ഭാഗം പഞ്ചായത്ത് ഫണ്ട് ഉപയോഗിച്ച് പൂർത്തിയാക്കിയിട്ടും അനിയമിതത്വം നടന്നതായി യുഡിഎഫ് ആരോപിച്ചു. വോട്ടർ പട്ടികയിൽ താൽക്കാലിക ജീവനക്കാരുടെ ഇടപെടലുകളും ക്രമക്കേടുകളും അവസാനിപ്പിക്കണമെന്നും, കണ്ണനൂർ–ചെമ്മംകുന്ന് റോഡിന് ജില്ലാ പഞ്ചായത്ത് അംഗം അനുവദിച്ച 10 ലക്ഷം രൂപയുടെ പ്രവർത്തനത്തിന് പഞ്ചായത്ത് അനുമതി നൽകാത്തതിലും പ്രതിഷേധം അറിയിച്ചു.
പഞ്ചായത്ത് ഓഫീസ് നവീകരണ പ്രവർത്തനങ്ങളിലും തെരുവിളക്ക് റിപ്പയർ, മാലിന്യ നീക്കം തുടങ്ങിയ വിഷയങ്ങളിലും അഴിമതിയുണ്ടെന്ന് ആരോപിച്ച് യുഡിഎഫ് നേതാക്കൾ ശക്തമായ നിലപാട് പ്രകടിപ്പിച്ചു.
പ്രതിഷേധ ധർണ്ണ കെ.പി.സി.സി നിർവാഹക സമിതി അംഗം സി.വി. ബാലചന്ദ്രൻ ഉദ്ഘാടനം ചെയ്തു. യുഡിഎഫ് പഞ്ചായത്ത് ചെയർമാൻ പി.എം. മോഹൻദാസ് അധ്യക്ഷത വഹിച്ചു. ഡിസിസി ജനറൽ സെക്രട്ടറി പി.വി. മുഹമ്മദ്അലി, യുഡിഎഫ് പഞ്ചായത്ത് ജനറൽ കൺവീനർ കെ.വി. ഹിളർ, പഞ്ചായത്തംഗം പത്തിൽ അലി, മണ്ഡലം കോൺഗ്രസ് പ്രസിഡണ്ട് എം. മണികണ്ഠൻ, ഡിസിസി അംഗം പി.കെ. അപ്പുണ്ണി, പ്രവാസി കോൺഗ്രസ് സംസ്ഥാന സെക്രട്ടറി കെ. ഷംസുദ്ദീൻ, എം.എൻ. നൗഷാദ്, കെ. ഹബീബ്, എം. മുരളീധരൻ, ഇ. രാജേഷ്, കെ. സുജാത, കെ. പ്രിയ, പി.വി. ഗഫൂർ, ടി.പി. മണികണ്ഠൻ, ടി.ടി. അബ്ദുള്ള, പി. അലി, സി.പി. മുസ്തഫ, കെ.എം. ഫസലുൽ ഹക്ക്, പി.വി. ബീരാവുണ്ണി, ടി.പി. സക്കീന, കെ.സി. ബേബി രേഖ എന്നിവർ പ്രസംഗിച്ചു.