പട്ടാമ്പി മണ്ഡലത്തിലെ മൂന്ന്‌ സമഗ്ര കുടിവെള്ള പദ്ധതികളുടെ നിർമാണം 80 ശതമാനത്തിലധികം പൂർത്തിയായതായി മാഞ്ഞാമ്പ്രയിലെ പ്ലാന്റ്‌ സന്ദർശിച്ച മുഹമ്മദ് മുഹസിൻ എംഎൽഎ പറഞ്ഞു. കുടിവെള്ള പ്രശ്നത്തിന് ശാശ്വത പരിഹാരത്തിനായി 2016നുശേഷം സംസ്ഥാന സർക്കാർ അനുവദിച്ചതാണ്‌ പദ്ധതികൾ.
തിരുവേഗപ്പുറ–- മുതുതല–- പരുതൂർ പദ്ധതിയുടെ അവസാനഘട്ട പ്രവൃത്തി വിലയിരുത്താൻ എത്തിയതാണ്‌ എംഎൽഎ. പട്ടാമ്പി മണ്ഡലത്തിലെ മുതുതല, തിരുവേഗപ്പുറ പഞ്ചായത്തുകളിലും, തൃത്താല മണ്ഡലത്തിലെ പരുതൂർ പഞ്ചായത്തിലുമുള്ള കുടുംബങ്ങളാണ് പദ്ധതിയുടെ ഗുണഭോക്താക്കൾ. ട്രയൽ റൺ പൂർത്തിയാക്കി. ആദ്യഘട്ടത്തിൽ 115 കോടി 19 ലക്ഷം രൂപയാണ് അനുവദിച്ചത്. മൂന്നുഘട്ടമായി നടക്കുന്ന ശുദ്ധീകരണ പ്രക്രിയക്കുശേഷമാണ് കുടിവെള്ള വിതരണം. 16 ദശലക്ഷം സംഭരണശേഷിയുള്ള ജലശുദ്ധീകരണ ശാലയാണ് പദ്ധതിയുടെ ഭാഗമായുള്ളത്. 47 ലക്ഷം ലിറ്റർ ശേഷിയുള്ള ജലസംഭരണിയും ഇതിനുണ്ട്.
