പട്ടിത്തറ: പൂരാഘോഷത്തിനിടെ എയർഗസ്സുമായി അഭ്യാസ പ്രകടനം നടത്തിയ യുവാവിനെ പൊലീസ് പിടികൂടി. പടിഞ്ഞാറങ്ങാടി വേങ്ങശ്ശേരി പുരത്തിനിടെയാണ് സംഭവം. വേങ്ങശ്ശേരി ഉത്സവാഘോഷത്തിനിടെ ദിൽജിത്താണ് എയർഗണുമായി വരവിനൊപ്പമെത്തിയത്. തൃത്താല കോക്കാട് സെന്ററിൽ വച്ചാണ് യുവാവിൻ്റെ കയ്യിലുള്ള തോക്ക് പൊലീസിന്റെ ശ്രദ്ധയിൽപ്പെടുന്നത്.
തുടർന്ന് എയർഗൺ പൊലീസ് കസ്‌റ്റഡിയിലെടുത്തു. തോക്ക് കസ്‌റ്റഡിയിലെടുത്ത തൃത്താല പൊലീസ് ഒതളൂർ സ്വദേശി ദിൽജിത്തിനെ കേസെടുത്ത് വിട്ടയച്ചു. ഉത്സവ പരിപാടികൾക്കിടയിൽ എയർഗൺ പ്രദർശിപ്പിച്ചതിനും, എയർഗൺ അശ്രദ്ധമായി കൈകാര്യം ചെയ്തതിനുമാണ് കേസെടുത്തിരിക്കുന്നത്.
അതേസമയം താൻ വാടക സാധനങ്ങൾ എടുക്കുന്ന കടയിൽ നിന്നും പ്രദർശന വസ്തു എന്ന നിലക്ക് വാടകക്ക് എടുത്തതാണെന്നും പ്രസ്തുത സാധനം എയർഗൺ ആണെന്ന് അറിയില്ലായിരുന്നു എന്നും ദിൽജിത് തൃത്താല ന്യൂസിനോട് പറഞ്ഞു.
എയർഗൺ പൊട്ടിയിരുന്നെങ്കിൽ പൊതുജനങ്ങളുടെ ജീവന് അപായം സംഭവിക്കുമായിരുന്നെന്നും എഫ്.ഐ.ആറിൽ പറയുന്നു. പെരുമ്പിലാവിൽ നിന്നാണ് യുവാവ് എയർഗൺ വാടകയ്ക്ക് എടുത്തതെന്നാണ് പൊലീസ് കണ്ടെത്തിയിട്ടുള്ളത്.